المبدع نجم فن الغناء الشعبي يوسف البربري في ضيافة نبض المهاجر
☆الغناء الشعبي حياتي لأني اتولدت واتربيت في ام درمان حي العرب والمسالمة
☆ الغناء الشعبي اقرب لتفاصيل البيوت السودانية
☆ الوالد كان رافض اغني وقال لي يا ولدي انا بأكل الصباح الخرطوم كلها قلت ليه وانا في الليل برقص الخرطوم كلها
☆الغناء الشعبي والحقيبة هي المربية للأجيال والشكلت وجدان السودانيين
☆ اي اغنية للبربري ناجحة لأنها بتكون هابشة حتة جوة اي زول
☆ تعال اقول ليك ( نحن ناس النيل والغابة والصحراء) وبناكل البعوم والبيطير والبمشي برجلين
☆ شجعني للغناء احمد الصادق وحسين الصادق
بعد ان تناولنا اشهي واطيب سمك بلطي مشوي ومقلي وجمبري وارز صيادية، كان لقائي به يشبه طيبة اهل امدرمان وعفويتهم ذلك هو نجم الغناء الشعبي في بلادنا المطرب المبدع يوسف احمد حسين الشهير بيوسف البربري وذلك في مطعمه الانيق بحي السويدي والذي افتتحه باسم بلطي بربري .. فأبحرت معه في بوح شفيف يشبه ابداعه
فإلى مضابط الحوار
▪︎ في البدء من هو يوسف البربري ؟
انا يوسف احمد حسين ابراهيم سوداني بسيط بكل جمال وتفاصيل اهل السودان ولا اقول انا من هنا وهناك ( يقصد القبيلة ) انا الزول البشبهكم ، الوالد بتاع مطاعم اسماك البربري المعروفة في العاصمة متزوج من شهد الحارث لها عبركم التحية واقول ليها ربنا يغطي عليك ويحفظك لي ، بسميها ام الشفوت لأنه عندي خمسة اولاد ( احمد ، صالح ، محمد ، عزت ، وصفوت) ( وبنت واحدة اسمها وداد ) الله يحفظهم لي ، اما اخواني فهم ( صلاح ، عزت ، طلعت ، صفوت، وعزالدين ، وعلاء الدين ) وكلهم بيعملوا في مجال الاسماك اما اخواتي ( عوضية ، عواطف ، عايدة ، وزينب) الحمد لله ميزناهن بدخول الجامعات
▪︎ مع ظهورك احدثت ضجة كبيرة واصبحت مطلوب في الساحة السودانية في المناسبات احكي لنا عن دخولك في مجال الفن الشعبي
اولا الوالد كان رافضا اني اغني في يوم قرأ في جريدة عرف اني بغني زعل وقال (يا ولدي انا بأكل الخرطوم كلها الصباح قلت ليه وانا برقص الخرطوم كلها بالليل) ، بصراحة الفن الشعبي حياتي لأني اتربيت في امدرمان في حي العرب وفي المسالمة في بيت الطاهر ابراهيم وبشوف ناس ميرغني المأمون ومحمد احمد عوض والكحلاوي وكمال ترباس ، ده عالم تاني ، كنت بحس انه الغنى الشعبي اقرب لتفاصيل البيوت السودانية من زمن الحبوبات ودندناتهم فتلقي الغنا الشعبي هو المتوارث ضيفي لذلك اغاني الفن الشعبي والحقيبة هي المربية للأجيال وهي بتشكل وجدان الناس ، المهم لاحظت انه الناس وصلت مرحلة بقت ما بتجيب فنان يكتفوا بالأورغ وغنا النبق النبق ويرقصوا ففكرت عشان اجيب الناس اجي بفكرة ووضع جديد وبما انه نحن مزيج من الافارقة والعرب فأخدت اجمل ما عند الافارقة واجمل عند العرب لكن الافريقية غالبة فجاءت على المسرح بالرقيص والحركة فخلقت نجومية ما ليوسف براه بل للكورس ولكل الفرقة المصاحبة
▪︎ غير الغناء لك ايضا في نظم الشعر حدثنا عن تجربتك في نظم القصائد؟؟
كنت بكتب نثر قبل وفاة الوالدة رحمة الله عليها ، بديت بالنثر وكتبت سفينة الاحزان تلقفني اخونا امجد حمزة وطلب مني احول النثر لشعر فكان ان كتبت اول كلمات اغنية اسمها ( يسلم لي فرح الجلابة ) غنتها ندى القلعة وقدورة الله يرحمه .. بعد داك (اخدت شاكوش ) ( انفجر ضاحكا) (علقت له اكيد كتبت درر ).. واصل .. كتبت عدد من القصائد الغنائية منها ادمنت ريدك ، خسارة ريدك ، الله ليك يا عينيا خلاص يا قلب ، وكتير كتير تغنى بيها الشباب ( حسين الصادق ، احمد الصادق ، شكر الله عز الدين ، فرفور ، نزار المهندس، عبد الكريم ابوطالب ، قرقوري، عاطف السماني ، واحمد فتح الله ) واخر عمل كان مع احمد فتح الله ( سفينة الاحزان )
شوفتي كيف يا يمه
الكون ملامحه اتغيرت
الحمد لله اي اغنية للبربري ناجحة لأنها بتكون هابشة حتة جوة اي زول
▪︎ عايزة اعرف منو حمسك للغناء الشعبي؟
شجعني احمد الصادق وحسين الصادق ،، اول ناس ،، الحاجة التانية مشيت في يوم لأحمد هاشم له التحية والشكر اتعامل معاه في اغنية ( عندي شوفتك لي زي صباح العيد انا وين يا جدي الصيد) فطلب مني اشاركه في زواج فطلعت المسرح تاني ما نزلت ..
▪︎ ما هو رايك في الحرب في السودان ودوركم كفنانين في ايقاف الحرب والسلام؟
شوفي لا السودان ولا اهل السودان بشبهوا الحرب والشعب السوداني ما بستاهل الحصل في الحرب ، نحن امة متسامحة جدا والدليل .. في شارع بيتكم بتلقي كل الوان الطيف السوداني الفوراوي والزغاوي والشايقي والحلفاوي والدنقلاوي والجعلي وكل السحنات بتلقيهم كمان في المدرسة في السوق في مكان الشغل فالجاب الحربة شنو ؟ الجابوا الحرب ديل ما سودانيين ، ونحن خلف جيشنا وعلينا كلنا نشر الوعي بدون ما ننسى منو الهتك عروضنا وادخلنا في الحرب .. والحرب امتحان من ربنا وان شاء الله يعوضنا .. علينا بالصبر وسيوفى الصابرون اجرهم ، المهم نحن عاوزين نعمل زي ما عملت رواندا ختت الكورة واطه وبنوا بلدهم
▪︎ يوسف البربري وانتقاله للسعودية ومشروع اسماكه الطيبة حدثنا عن ذلك ..
الله يرحم والدنا كل يوم بنكتشف انه علمنا ومازال يعلمنا ، السمك كارنا منذ جدود جدودنا .. وعلمنا سر الخلطة .. لما عرضوا لي المحل افتحه مطعم سمك في الاول كنت متخوف لأنه السوق السعودي عنده معايير معينة — وبيني وبينك كنت خاتي انه الحرب انتهت ونحن راجعين بحلم ، المهم وجدت انه هنا في الاسر والاطفال والشباب وجالية سودانية عددها كبير وهي المتحركة في الاسواق،، ابتدينا الشغل والحمد لله على ما انعم ، وعايز اقول ليك عمل المطاعم عمل صالحين ودي كلمة بقولها لأي صاحب مطعم لأنه البتناول طعامك ودفع ليك قروشه ما عارف انت عملت الاكل دا كيف فلازم تخاف الله في الناس .. واحكي ليك لما عملت تدشين للمطعم قال لي واحد اول مرة اعرف انه السودانيين يأكلون اللحم معروف عنكم تأكلون الويكه وكدا قلت ليه تعال اقول ليك ( نحن ناس النيل والغابة والصحراء) وبناكل البعوم والبيطير والبمشي برجلين نحن اول ما نصحى الصباح بناكل اللحم والويكا دي بنزلق بيها اللحم ( وضحكنا)
▪︎ اين يوسف البربري الفنان في الرياض
شغال في كافة المناسبات بازارات افراح
▪︎ اين انت من فعاليات حديقة السويدي ؟
لا تعليق ( وصمت ) ( اصريت ) قال مع احترامي الشديد لهيئة الترفيه الا انه القائمين على امر اسبوع السودان (وهم من ابناء جلدتنا ) لا يضعون السودان في مكانه الصاح كدولة ذات حضارة وتاريخ فني وثقافي قديم مفترض يتم التعامل معه بما يليق به
▪︎ ختاما ماذا تقول
اشكرك جزيل الشكر على الفرصة الطيبة
عن الكاتب
